இந்திய பாராளுமன்ற தேர்தல் தமிழக பிரசாரக் களத்தில் முக்கிய சர்ச்சையாகும் இலங்கைப் பிரச்சினை

* காங்கிரஸை நியாயப்படுத்த வேண்டிய நிலையில் கருணாநிதி
இந்திய பாராளுமன்றத் தேர்தலில் தமிழக பிரசாரக் களத்தில் இலங்கைத் தமிழர் பிரச்சினை முக்கியமான ஒரு சர்ச்சையாக்கப்படுவதற்கான சகல அறிகுறிகளையும் காணக்கூடியதாக இருக்கிறது.

இலங்கைப் பிரச்சினை தேர்தலில் எந்தவிதமான தாக்கத்தையும் ஏற்படுத்தமாட்டாது என்று சில தினங்களுக்கு முன்னர் கூறியிருந்த தமிழக முதலமைச்சரும் திராவிட முன்னேற்றக்கழகத் தலைவருமான கலைஞர் மு.கருணாநிதி நேற்றைய தினம் சென்னையில் கழகத்தின் தலைமைச் செயலகமான அண்ணா அறிவாலயத்தில் நடைபெற்ற கூட்டமொன்றில் எதிர்க்கட்சிகள் இலங்கைப் பிரச்சினைக்கு அரசியல் சாயம் பூசுவதற்கு முயற்சிப்பதாகக் குற்றஞ்சாட்டியிருக்கிறார்.

முன்னாள் முதலமைச்சர் செல்வி ஜெயலலிதா தலைமையிலான அனைத்திந்திய அண்ணா திராவிட முன்னேற்றக்கழகத்துடன் தேர்தல் கூட்டணியை அமைத்திருக்கும் பாட்டாளி மக்கள் கட்சியின் நிறுவுநர் டாக்டர் எஸ்.ராமதாஸ் இலங்கைப் பிரச்சினையை முதன்மைப்படுத்தியே தேர்தல் பிரசாரம் அமையும் என்று அறிவித்திருக்கும் நிலையிலேயே கலைஞர் கருணாநிதி எதிர்க்கட்சிகள் மீது இத்தகைய குற்றச்சாட்டைச் சுமத்தியிருப்பது குறிப்பிடத்தக்கது.

ராமதாஸின் நிலைப்பாடு

"பாராளுமன்றத் தேர்தலில் தமிழகத்திலும் புதுச்சேரியிலும் இலங்கைப் பிரச்சினையை முதன்மைப்படுத்தி மக்களிடம் பிரசாரத்தைக் கொண்டு செல்வோம். இது தொடர்பாக ஒரு மித்த கருத்து உருவானதன் அடிப்படையிலேயே அண்ணா தி.மு.க.கூட்டணியில் இணைந்திருக்கிறோம். இலங்கைப் பிரச்சினையில் தி.மு.க.எந்தளவுக்குச் செயற்பட்டுள்ளது. என்பது தொடர்பாக உண்மையோடும் உறுதியோடும் பிரசாரங்கள் அமையும்' என்று டாக்டர் ராமதாஸ் கூறியிருக்கிறார். சொற்பொழிவாளர்களுக்கு கலைஞர் அறிவுறுத்தல்

தேர்தல் பிரசாரங்களை எந்தவகையில் முன்னெடுக்க வேண்டும் என்பதை தி.மு.க.சொற்பொழிவாளர்களுக்கு விளக்குவதற்காக நேற்று அண்ணா அறிவாலயத்தில் நடைபெற்ற கூட்டத்தில் உரையாற்றிய முதலமைச்சர் கருணாநிதி "மத்திய, மாநில அரசுகள் மீது எந்தக் குற்றத்தையும் சொல்ல முடியாத நிலையில் இருக்கும் எதிர்க்கட்சிகள் இலங்கைப் பிரச்சினைக்கு அரசியல்சாயம் பூச நினைக்கின்றன. இது ஒருபோதுமே சாத்தியப்படாது. தேர்தல் பிரசாரங்களின்போது தி.மு.க.சொற்பொழிவாளர்கள் இலங்கைப் பிரச்சினையை எதிர்க்கட்சிகள் அரசியலாக்கிவருவதை மக்களுக்கு எடுத்துரைக்க வேண்டும்' என்று வலியுறுத்திக் கேட்டுக்கொண்டார்.

தி.மு.க.வும் காங்கிரஸும் இலங்கைத் தமிழர்களுக்கு எதிராகச் செயற்படுவதாக தேர்தல் பிரசாரங்களின் போது எதிர்க்கட்சிகள் தமிழக மக்களுக்கு கூற முற்படும் என்பதைநேற்றைய கூட்டத்தில் கலைஞர் கருணாநிதி வெளிப்படையாகவே குறிப்பிடத் தவறவில்லை. ஜனநாயக ரீதியில் இலங்கைத் தமிழர்கள் வாக்களித்து தமிழீழம் மலர்ந்தால் தன்னைவிட அதிகம் மகிழ்ச்சியடைபவர்கள் வேறுயாரும் இருக்க முடியாது. இதையெல்லாம் மக்களுக்குச் சொல்லி தேர்தல் பிரசாரங்களை தி.மு.க.சொற்பொழிவாளர்கள் முன்னெடுக்கவேண்டும் என்று அவர்களுக்கு கலைஞர் அறிவுறுத்தியிருக்கிறார்.

இலங்கைப் பிரச்சினை தமிழகத்தில் பாராளுமன்றத் தேர்தலில் எந்தத் தாக்கத்தையும் ஏற்படுத்தாது என்று சில தினங்களுக்கு முன்னர் கூறிய கலைஞர் தற்போது இலங்கைப் பிரச்சினையில் தி.மு.க.வின் தமிழர் சார்பு நிலையை மக்களுக்கு எடுத்துச் சொல்ல வேண்டுமென்று சொற்பொழிவாளர்களுக்கு அறிவுறுத்த வேண்டிய அளவுக்கு நிர்ப்பந்திக்கப்பட்டிருப்பதைக் காணக்கூடியதாக இருக்கிறது. இந்த நிலைமை தேர்தல் பிரசாரக்களத்தில் இலங்கைப் பிரச்சினை பெறப்போகும் முக்கியத்துவத்தைப் பறைசாற்றி நிற்கின்றன என்று அவதானிகள் கூறுகிறார்கள்.

காங்கிரஸ் மீதான அதிருப்தி

காங்கிரஸ் தலைமையிலான ஐக்கிய முற்போக்கு கூட்டணி அரசாங்கம் இலங்கையில் போரை நிறுத்துவதற்கு அதன் செல்வாக்கை கொழும்பு அரசாங்கத்திடம் பயன்படுத்த வில்லை என்பதே தி.மு.க.வுக்கு எதிரான தமிழக கட்சிகளின் நிலைப்பாடாகும். மத்திய அரசாங்கம் அதன் செல்வாக்கைப் பிரயோகிக்கக்கூடியதாக கலைஞர் கருணாநிதியும் நெருக்குதல்களைக் கொடுக்கத் தவறியதாகவும் மத்திய அரசாங்கத்தின் இலங்கை தொடர்பான அணுகுமுறையை ஆட்சேபிக்க அவர் துணிச்சல் கொள்ளவில்லை என்றுமே எதிர்க்கட்சிகள் குறிப்பாக ஜெயலலிதா அணியில் உள்ள வைகோவின் மறுமலர்ச்சி தி.மு.க., ராமதாஸின் பாட்டாளி மக்கள் கட்சி ஆகியவை குற்றச்சாட்டுகளை முன்வைக்கின்றன.

புதுடில்லியில் உள்ள காங்கிரஸ் தலைமைத்துவம் இவர்களைத் தமிழர்களின் மனிதாபிமான நெருக்கடி தொடர்பில் தமிழகத்தில் உருவான அனுதாப அலையை உணர்வுகளை மதிக்கவில்லை என்ற குமுறல் தமிழக மக்களிடம் தற்போது பரவலாகக் காணப்படுகிறது. காங்கிரஸ்கரகளுக்கு ஒருபாடத்தைப் புகட்டுவதற்கு பாராளுமன்றத் தேர்தலை அருமையான வாய்ப்பாகப் பயன்படுத்தவேண்டும் என்ற பிரசாரங்கள் தமிழகத்தில் உள்ள தீவிர ஈழத்தமிழர் ஆதரவு அமைப்புகளினால் சந்தடியில்லாமல் முன்னெடுக்கப்படுவதாகவும் அறியக்கிடைக்கிறது. இத்தகைய சூழ்நிலையிலே தமிழக மக்கள் மத்தியில் உருவாக்கப்படக்கூடிய காங்கிரஸ் விரோத உணர்வு தனது கூட்டணியின் செல்வாக்கை குறைத்துவிடக்கூடும் என்று கலைஞர் கருணாநிதி சந்தேகப்படுவதாக சென்னை அவதானிகள் கூறுகிறார்கள்.

காங்கிரஸ் கட்சியுடன் கூட்டணி அமைத்து தேர்தலில் போட்டியிடுகின்ற தி.மு.க.வினர் இலங்கைத் தமிழர் பிரச்சினையில் காங்கிரஸின் அணுகுமுறையையும் நியாயப்படுத்த வேண்டிய ஒரு துரதிர்ஷ்டவசமான நிலைக்குத் தள்ளப்பட்டிருப்பதையும் காணமுடிகிறது. தி.மு.க. காங்கிரஸ் கூட்டணியில் இலங்கைத் தமிழர் பிரச்சினையில் தீவிர நிலைப்பாட்டைக் கொண்டுள்ள தொல்.திருமாவளவனின் விடுதலைச் சிறுத்தைகள் கட்சியும் அங்கம் வகிக்கிறது. ஆனால், அந்த அணியில் இருந்துகொண்டு தேர்தல் பிரசாரங்களில் திருமாவளவன் தனது தீவிர நிலைப்பாட்டை எவ்வாறு மக்கள் முன் வைக்கப்போகிறார் என்பதும் ஒரு பிரச்சினையாகும். ஆனால், ராமதாஸின் கட்சிக்கு எதிராக விடுதலைச் சிறுத்தைகளைப் பயன்படுத்துவதற்கு கலைஞர் கருணாநிதி தீர்மானித்திருக்கிறார்.

ஜெயலலிதா அணியில்

அண்ணா தி.மு.க. தலைமையிலான அணியில் இருக்கும் கட்சிகளில் மறுமலர்ச்சி, தி.மு.க., பாட்டாளி மக்கள் கட்சி, இந்திய கம்யூனிஸ்ட் கட்சி, மார்க்சிஸ்ட் காம்யூனிஸ்ட் கட்சி ஆகியவை இலங்கை நெருக்கடி தொடர்பிலான ஐக்கிய முயற்போக்கு கூட்டணி அரசாங்கத்தின் அணுகுமுறையைக் கடுமையாக விமர்சிப்பவையாகும். நேற்றைய தினம் சென்னையில் ஜெயலலிதாவைச் சந்தித்த மார்க்சிஸ்ட் கம்யூனிஸ்ட் கட்சியின் பொதுச் செயலாளர் பிரகாஷ்காரத் இலங்கையில் போர்நிறுத்தம் ஏற்படவேண்டும் என்று வலியுறுத்தியிருந்தமை கவனிக்கத்தக்கது.

இலங்கைத் தமிழர் ஆதரவுப் போராட்டங்கள் தமிழகத்தில் கடந்த வருட நடுப்பகுதியில் இருந்து தீவிரமடையத் தொடங்கியபோது அவற்றுக்கு ஆதரவு அளிக்காமல் இருந்து வந்த ஜெயலலிதா அண்மையில் உண்ணாவிரதப் போராட்டத்தில் குதித்ததே, காங்கிரஸுக்கும் கலைஞருக்கும் எதிராக இலங்கைப் பிரச்சினையைப் பயன்படுத்தக் கூடிய அளவுக்கு தமிழக நிலைமைகள் மாறியதை உணர்ந்தமையேயாகும் என்றும் சென்னை அவதானிகள் கூறுகிறார்கள்.